नेपाली हास्यव्यङ्ग्य अनलाइन पत्रिका

आश्विन शुक्लपक्षबाट दशैं पनि आउने
घरघरमा घरमुलीलाई ब्लडप्रेसर बढाउने
बालबच्चाको कुरै छोडौँ नाच्दै रमाउने
निमुखा ती जनावरको बली चढाउने

त्यति मात्र कहाँ हो र कोदो–रस चुसी
जोरजम्मा नयाँ लुगा काट्नै पर्ने खसी
बैंकमा लाईन बसीबसी नयाँ नोट साट्नु पर्ने
मान्यजन सामु निधार तेर्स्याई टीका माग्नु पर्ने

यसैगरी जेनतेन चाड मान्दै गयो
उमेरसँगै आफ्नो पेट खुम्च्याउँदै लग्यो
जब जब सन्तानहरू बढ्दै बढ्दै जान्छन्
उमेरसँगै ठूला भई सक्षम बन्दै जान्छन्

लाखौँ लाख खर्च गरी बिहे गरिदियो
हुर्किदैछन् छोराछोरी घरजम् गरिदियो
आफ्नै आमाबुबा भने पाखा लाग्नु पर्ने
एकै घुट्को पानी पिउन छट्पटाउनु पर्ने

यस्ता बाबुआमालाई चाडवाड आउँदा
हाँस्नु होइन रूनु पर्ने अपहेला पाउँदा
बृद्ध बाबुआमालाई हेला गर्ने छोरा
तिनीहरू छोरा हैनन् अगतिला मोरा ।

काठमाडौं