नेपाली हास्यव्यङ्ग्य अनलाइन पत्रिका

काठमाडौं थियो चोखै उस्तै चोखो अझै छ यो
जो जो दुष्ट यहाँ आए उन्कै इज्जत पो गयो ।

न ता बोल्छन् पशुपति नीलकण्ठ न हेर्दछन्
जिम्मा जल्ले लिएका छन् उनैले गर्नु गर्दछन् ।

कहाँ कहाँका भतुवा के के निहुँ गरी पसे
कर्ता धर्ता उनै हुन् झैं ठेकेदार भई बसे ।

यो हो मेरो कान्तिपुरी यो हो अमरको पुरी
नेपाल भन्ने पाङ्ग्राको बलियो बीचको धुरी ।

धुरी समाउने सक्छन् जता चाह्यो घुमाउन
घुम्यो भन्दै धुरीलाई होला के दोष लाउन ।

राम्रा नियतका शुद्ध हात छानी पठाउनू
विष्ठा हाल कि नैवेद्य थाल के दोष लाउनु ?

कमलपोखरी, काठमाडौं