नेपाली हास्यव्यङ्ग्य अनलाइन पत्रिका

पहिलो दृश्य

गरिबीको सुनामीमा फसेकोले होला, लक्ष्मीनाथलाई सुके भनेर सबैले बोलाउने गर्दथे । मकैको खोले, सिस्नुको साग, ढिँडो र स्वादरहित खानाबाहेक उनको मुखमा मीठो–मसिनो कहिल्यै परेको थिएन । पातलो कडा ओछ्यानमा सुत्न विवश थिए उनी ।

दोस्रो दृश्य

सुकेको जीवनमा दोस्रो सुनामी आयो । राजनीतिको छालले उनी छोटो समयमै लक्ष्मीनाथज्यू भए । महँगा रक्सी, पाँचतारे होटेलका परिकार, विदेशी चुरोट, मासु–मिठाई आदिका चौरासी व्यञ्जनले गर्दा उनको शरीर बङ्गुरभन्दा गोलो भयो ।

तेस्रो दृश्य

लक्ष्मीनाथज्यूको जीवनमा तेस्रो सुनामी आयो । अधिक एवम् विषम भोजनको कारण उनी उच्चरक्तचाप, बाथ र मधुमेहका रोगी भए । कीर्ना जस्तो उनको शरीर हेर्दाहेर्दै सुकेमै फर्कियो र अहिले उनी भव्य महलमा पनि चिकित्सकको सल्लाहअनुसार पातलो तन्ना ओछयाएको कडा खाटमा मकैको खोले, सिस्नुको साग, ढिँडो र स्वादरहित खाना खाएर चौथो सुनामीको प्रतीक्षामा जीवन धानिरहेका छन् ।