नेपाली हास्यव्यङ्ग्य अनलाइन पत्रिका

ओइ, नेताज्यू
यसपाली पनि संविधान
खोइ नेताज्यू ?
ऊ प्रधानमन्त्री भए हुँदैन
म भए मात्र बन्छ भनी
सबलाई ठीकठाक पार्यौ
आफू हुँदा बनाउन नसकेपछि
राजिनामा ठोकेर
अर्काको काँधमा सार्यौ
अर्कालाई लडाउँछु भन्दा
आफ्नै सेखी झार्यौ
ओइ, नेताज्यू
यसपाली त ल्याउँछु भन्या
संविधान खोइ नेताज्यू ?

दुई वर्षको सभालाई
छ वर्षसम्म सार्यौ
अन्तमा बनाउन नसक्दा
देशलाई चुनावको घानमा पार्यौ
अरुलाई हराउँछु भन्दा
आफै नराम्रोसँग हार्यौ
अझै पनि नबनाउने भए
चुनाव गराएर के फार्यौ ?
ओइ, नेताज्यू
यसपाली त
जसरी पनि बनाउँछु भन्या
संविधान खोइ नेताज्यू ?

छ छ वर्षको तलब भत्ताले
ढुकुटी झ्वाम्म पार्यौ
अन्योल र अन्धकारमा
देशै च्वाम्म पार्यौ
जनताको पसिना चुसी
चुनाव क्षेत्रको नाममा
करोडौ बजेट खोज्दैछौ
फेरि पनि संविधान नबनाएर
कुन बाटो रोज्दैछौ ?
ओइ, नेताज्यू
यसपाली त बनाएरै छाड्छु भनेको
संविधान खोइ नेताज्यू ?

दिग्भ्रममा छौ कि मतिभ्रममा छौ
लाजसाज पचाएर
कुन शरममा छौ
ढाँटको खेती गरी
गाँठ कमाउने
कुन धरममा छौ ?
कहिले तानातान
कहिले हानाहान
अझै पनि ठन्डा नभएर
कुन गरममा छौ
ओइ, नेताज्यू
यसपाली त बन्छ बन्छ भनेको
संविधान खोइ नेताज्यू ?

दाङ, हाल काठमाडौं