उत्तमकृष्ण मजगैयाँहाम्रा बुद्धिजीवी !
चमत्कारको आशामा हाम्रा बुद्धिजीवी !
दिउँसै छन् नशामा हाम्रा बुद्धिजीवी !
विचार अरूकै, दर्शन र सिद्धान्त अरूकै
कस्तो यो दुर्दशामा हाम्रा बुद्धिजीवी !
शिक्षा उतैको, नीति र भिक्षा उतैको
छन् उतैको ‘कशा’मा हाम्रा बुद्धिजीवी !
काम, कुरा, चर्तिकला सबै इशारामै
‘प्रभु’हरुकै ‘पसा’मा हाम्रा बुद्धिजीवी !
धम्की, घुर्की ,चुनौती र लज्जा बोल्छन् सधैँ
कठपुतलीको भाषामा हाम्रा बुद्धिजीवी !
मन, माटो, धर्म, संस्कृति बराबरी ठान्दै
खडा छन् दशगजामा हाम्रा बुद्धिजीवी !
(शब्दार्थ ; कशा = कोर्रा, डोरी / पसा = दया, कृपा)
दाङ
Subscribe
Login
0 Comments
Oldest
