नेपाली हास्यव्यङ्ग्य अनलाइन पत्रिका

घँचेटी घँचेटी अवस्था नहेरी ।
कहाँ के छ अडचन् नसोची बिचारी ।।
जकेडेर यात्री कता लुत्त ढाल्ला ।
लिई पूर्ण शंका कहाँ फुत्त फाल्ला ।।

हरे राम अम्बे जपी हुन्छ यात्रा ।
सवारी भनौं के खटारा र थोत्रा ।।
कसैले भनुन् वा नबोल्दै रहुन् तै ।
म भन्छु हटाओ छुसी सिन्डिकेटै ।।

थिएँ मख्ख सारै सुनी उच्च भाषण् ।
कठै आज पाएँ तिनै रद्दि पाषाण् ।।
जुनै काल हेर्दा ऊँ घेरै बसेका ।
म ठान्थेँ सुनेता रहेछन् कुनेता ।।

न फिक्री न चिन्ता कतै केहि नास्ती ।
सधैं नै निमूखाहरूमा छ सास्ती ।।
डडाँल्नो फुकालीकनै मात्र चेत्लान् ।
कहाँ भेटिएला म हेर्थें प्रशासन् ।।

२०७१ मंसिर
काठमाडौं