नेपाली हास्यव्यङ्ग्य अनलाइन पत्रिका

बिहान आन्दोलन घोषणा हुन्छ
तर वार्ताको ढोका खुल्ला छ
असहज वार्ताले जुधे झैँ गरे पनि
बेलुकी नशालु पेयले मुख कुल्ला छ ।

एउटाले आग्राको एउटा वार्ता गर्छ
अर्कोले गाग्राको अर्को वार्ता गर्छ
सुख र सुविधामा पाकेको रसिलो
किन जनताको विश्वास र आशमा झर्छ ?

बैठक बस्छ, नेताजीहरू बस्नुहुन्छ
हातै नबढाई सहमतिमा पुग्न खोज्नुहुन्छ
वार्ताको क्रममा चढ्नुहुन्छ खस्नुहुन्छ
संविधान भन्दा उतारचढाव रोज्नुहुन्छ ।

बैठकमा तीतो वातावरण मात्र हुन्छ
अरू बेला गाडी बङ्गला र मीठो हुन्छ
संवाद, सहकार्य, एकता र मेलमिलाप
तलब, भत्ता र कमिसनमा छिटो हुन्छ ।

वार्ता सकारात्मक भयो भन्छन्
तर बिना निष्कर्ष टुङ्गिएको छ
लेखन्दासहरूले लेख्नै हिच्किचाएपछि
संविधान निर्माण फेरि रोकिएको छ ।
उपाध्यक्ष, अनेसास लस एन्जेलस च्याप्टर
लस एन्जेलस