नेपाली हास्यव्यङ्ग्य अनलाइन पत्रिका

देशले मागे रगत दिन सबै तयार छन्
पसिना चैं दिन परे विदेश फरार छन् ।

मूल्यवान पसिना त विदेशीले किन्छ
स्वदेशमै कहाँ कसको पसिना यो बिक्छ ?
त्यसैले त देशलाई रगत दिन तयार छन्
पसिना चैं दिन परे विदेश फरार छन् ।

एक थोपा पसिनालाई रगत धेरै चाहिने
धेरै दही मथेपछि घिउ थोरै पाइने
रगत दिन्छु भन्छ सन्तान आफ्नी आमालाई
घिउ जति विदेशीलाई दही आमालाई !

देशको माया गर्छु भन्छ देशैलाई ढाँट्दै
पसिना चैं नदिनेले रगत दिन आँट्दै
कुन आमाले कुन छोराको रगत कहाँ माग्छन् ?
थोपो रगत नबगोस् है बरु आशिष दिन्छन् !

देसले मागे रगत दिन सबै तयार छन्
पसिना चैं दिन परे विदेश फरार छन् ।
काठमाडौं