नेपाली हास्यव्यङ्ग्य अनलाइन पत्रिका

बत्ती छैन पानी छैन
घर बढार्ने नानी छैन
घरबेटीको सधैं किचकिच
सानो सानो कुरा पनि
गर्याछन् खिचखिच
दिनहुँ कोठा खोज्यो
कतै कोठा पाको छैन
पाइहाल्यो भने पनि
भने जस्तो भाको छैन
थाकेर घरमा आउँदा
बुढी भन्छिन्
चिया बनाइ ल्याउँ है त
आज पाइन्छ भन्या
कोठा खै त ?

कतै ठूलो छ कोठा तर अँध्यारो
कतै उज्यालो छ तर छैन पँधेरो
कतै छ कोठा तर घाम नलाग्ने छिँडी
कतै सामान सार्नै नबन्ने छ सिँडी
कोठामा आयो कि बुढी भन्छे
खाजा बनाएर ल्याउँ है त
आज पाउँछ भन्या
कोठा खै त ?

बल्ल बल्ल आको तलव
भाडा बत्ती पानी फोहर भन्दै
आधी त घरबेटीले लिन्छ
बाँकी रकम उधारोलाई दिन्छ
बिचरो बिर्खे बर्षौंदेखि भनेको
एक सरो धोती कसरी किन्छ
सस्तो मस्तो कोठा खोज्न हिँड्यो
कतै ट्वाइलेट जाम छ
कतै धारामा पानी भर्नेको लाम छ
कोठा खोजेर घरमा आयो कि
बुढी भन्छे भोक लाग्यो होला
रोटी बनाउँ है त
आज त पाउँछ भन्या
कोठा खै त ?

कतै घरबेटी भन्छ
पाहुना ल्याउन पाइँदैन
कतै भन्छ
सन्तान ब्याउन पाइदैन
कतै भन्छ
छतमा जान पाइदैन
कतै भन्ने
कौशीमा खान पाइँदैन
वाक्क भएर घर फर्केको बेला
बुढीले भन्छे
थकाई लाग्यो होला
एक गिलास पानी ल्याउँ है त
यो पाली पाउँछ भन्या
कोठा खै त ?

दाङ, हाल काठमाडाैं