नेपाली हास्यव्यङ्ग्य अनलाइन पत्रिका

भ्यागुतो बुर्लुक्क उफ्रयो चेपागाँडा सँगै थिए
उस्को बर्कत देखेर सबै दङ्ग हुँदै थिए ।
यौटाले त भनी हाल्यो अहा क्या पौरखी तिमी
संसारभरमा यौटै पहिलो उफ्रने तिमी ।

तिमी उफ्र्रयौ भनेदेखि चन्द्रमा छुन सक्तछौ
इतिहास नयाँ यौटा तिमी नै रच्न सक्तछौ ।
चेपागाँडा त गाँडै हुन् अरूले पनि हो भने
यो हाम्रो भ्यागुतो दाजु विश्वमै श्रेष्ठ हो भने ।

जयकार कुनै गर्थे कुनै खादा लगाउँथे
प्रशस्ति वाचन गरी अभिनन्दन गर्दथे ।
भ्यागुतो पनि सन्केछ म साँच्चै मै हुँ ठान्दथ्यो
अरूहरू कसैलाई अब ऊ किन गन्दथ्यो ।

चन्द्रमा छुनका लागि ऊ बाटोबाट उफ्रियो
एकै बित्ता मात्र उफ्री नालीभित्र बजारियो ।
अनि ऊ टर्टराएछ सक्तथें चन्द्रमा छुन
अलि गर्मी भएकाले लागें अब चिसो हुन ।
कमलपोखरी, काठमाडौं