नेपाली हास्यव्यङ्ग्य अनलाइन पत्रिका

उहिले आमाले खाना खुवाउँदा
खान पटक्क मनै नलाग्दा
आमा भन्नु हुन्थ्यो–
खाउ है बाबु नत्र भूत आउँछ
अनि डरै डरले खाइन्थ्यो
के गर्नु ? नत्र भूत आउँछ !

पछि गुरुले यसो गर्नु उसो नगर्नु भनि सिकाउँदा
गुरुले भनेको मान्न मनै नलाग्दा
गुरु भन्नु हुन्थ्यो–
भनेको मान है बाबु नत्र पुलिस आउँछ
अनि डरै डरले भनेको मानिन्थ्यो
के गर्नु ? नत्र पुलिस आउँछ !

आजभोलि नेताले समर्थन माग्दा
आफूलाई बिरोध गर्न मन लाग्दा
नेताहरू भन्ने गर्छन्–
हाम्रो समर्थन गर, बिरोध नगर है, नत्र राजा आउँछ
अनि डरै डरले त्यहि गरिन्छ छ जे गरिँदै छ
के गर्नु ? नत्र राजा आउँछ !

डरै डरमा कति बाँच्छौ बाबु ?
आमा, गुरु, नेता र राजा बीचको फरक कहिले बुझ्छौ बाबु ?
आफ्नो भलाइ आफै कहिले सोच्छौ बाबु ?
अझै केटाकेटी छौ ? कहिले हुर्कन्छौ बाबु ? चाँडै हुर्क है
के गर्नु ? नत्र राजा आउँछ !

“भूत, पुलिस, राजा जे जे आए पनि म डराउँदिन
मलाइ ठिक नलागेको कुराको म समर्थन गर्दिन”
यत्ति भन्न सक्ने कहिले हुन्छौ बाबु ?
चाँडै भन्न सक्ने हौ है
के गर्नु ? नत्र राजा आउँछ !
काठमाडौं