नेपाली हास्यव्यङ्ग्य अनलाइन पत्रिका

सरकारी बनलाई
सहकारी बन बनायो
दुई चार जनालाई
समितिमा मनायो
ढलेको भन्दै
गलेको भन्दै
राम्रै रुख काटियो
दुई चार दाम बाटियो
हरियो बन नेपालीको मन
जसले काट्यो उसैको धन ।

आफ्नै मान्छेलाई
ठेकेदार बनायो
बनपाले रेन्जरलाई
हिस्सेदार बनायो
पार्टीलाई पनि जनायो
मक्केको भन्दै
सुकेको भन्दै
हरियो रुख काटियो
हरिया रुख बेचेर
हरियै नोट बाटियो
अरुले सकेन
आफूले त यो आँटियो
हरियो बन हाम्रो मन
जसले काट्यो उसैको धन ।

मोटा मोटा पेड
अग्ला अग्ला छाँट्यो
दुई चारको पूर्र्जी लिएर
सयौँ सयौँ काट्यो
सरकारलाई ढाँट्यो
समुदायलाई ढाँट्यो
अरुले सकेन आफैले आँट्यो
हरियो बन नेपालीको मन
जसले काट्यो उसैको धन ।

खयरको जरा
बयरको जरा
बनचोर भन्छ
त्यो चिबे चरा
रुख काटे पनि
हाँगा काटे पनि
तँ चिबे नकरा
सुकेको काट्यो
मक्केको काट्यो
पुगेन भने सद्दे नि काट्यो
तलदेखि माथिसम्म बाट्यो
हरियो धन नेपाली मन
जसले काट्यो उसैको धन ।
दाङ, हाल– काठमाडौं