नेपाली हास्यव्यङ्ग्य अनलाइन पत्रिका

म थिएँ हिन्दू हजुर बूढा बाइबल जप्ने
बेमेलको जिन्दगी थ्यो मलाई सधैँ खेप्ने
पहिला पहिला छनछन पैसा यसू भन्दै गने
भन्न त भूकम्पमा शिव–शिवै भने ।

फेर्के बूढा आफैंतिर भनी मैले सोचेँ
के फर्किन्थे बूढाले त छोडपत्र पो लेखे
छुट्टी सक्यौँ हामी बूढाबूढी अस्तिदेखि
भूकम्पनले हल्लाए नि गएन नै सेखी ।

देश हाँक्ने नेताजस्तै भए बूढा हजुर !
भूकम्पले थर्काए नि गएन है कसूर
नेता देश टुक्रा पार्छन् यो बूढाले घर
दमको रोगी म बूढीले कसको पर्नु भर ?

नेताहरूले खाल्टोखाल्टो पारेको यो देश
भूकम्पले पनि लियो नेताहरूकै भेष
कठै ! कठै ! ! नेपालीको कस्तो रहेछ कर्म
भूकम्प, नेता र बूढाले कहिले बुझ्ने मर्म ?

बस्ने बास, खाने गाँस आफन्त सब हराएको बेला
ल्याप्चे लगाई बूढाले त गरेछन् है खेला
नेता, भूकम्प र बूढालाई काटौँ–काटौँ लाग्छ
स्वर्गजस्तो देश टुट्दा निन्द्रा सधैँ भाग्छ ।
बुद्धनगर काठमाडौँ