नेपाली हास्यव्यङ्ग्य अनलाइन पत्रिका

यो भूकम्पले साथी
तपाइलाई खै कस्तो गर्या छ
आफूलाई त बजियाले
गर्नु गर्या छ ।

कहिले भात खानै लागेको बेला आउँछ
कहिले स्नान गर्न जाने बेला आउँछ
कहिले त बजिया
ट्वाइलेट छिरेको बेला आउँछ
आयो आयो भनेपछि
आफ्नो के आउँथ्यो र
कपडा समाल्दै भाग्नु पर्या छ
बेला न कुबेला आएर
यो भूकम्पले गर्नु गर्या छ ।

आउने नै हो भने
घरमा आउने पाहुनाले झैं
फोन गरेरै आउनु नि
कि चाँडो चर्पी गएर आइन्थ्यो
कि भूकम्प गएपछि गइन्थ्यो
कि जाँदै नगई बसिन्थ्यो
बेकारमा पटक पटक
यसरी किन फसिन्थ्यो ।

यो सरकार पनि यो बेला
खुला दिशामुक्त क्षेत्रलाई
खुल्ला गरी दिए हुन्थ्यो
कमसेकम शौचालय जाँदा
मान्छे ढुक्कले त जान्थ्यो ।

भोक लाग्छ खानै पर्यो
त्यो लाग्छ जानै पर्यो
अझ जाँदा चुक्कुल पो लाउनै पर्ने
यो चुक्कुलमा त
कति पटक नराम्ररी फँस्या छु
ढोका नै खोल्न नसकेर
मरिने भो भन्दै
थचक्क बस्या छु ।

भूकम्प र ट्वाइलेट पनि
सँगै आउनु पर्ने
कम्पिटिसन नै गर्या जस्तो
दुई झगडिया पार्टीको कार्यक्रम
एकै दिन पो पर्या जस्तो ।
दाङ, हाल– काठमाडौं