नेपाली हास्यव्यङ्ग्य अनलाइन पत्रिका

बोके छिनाल्दा पनि मर्न खोज्थे
मान्छे हकार्दा पनि मार्न खोज्थे
छेकेछ केले र पुगे पछाडि
कता गए ती अधिकारवादी ।

चुलो निभ्यो ग्याँस भएन बाल्न
पेट्रोल पाइन्न सकिन्न चल्न
नाका थुनी तष्कर काट्छ चाँदी
कता गए ती अधिकारवादी ।

बजारमा औषधि पाइँदैन
भोकै बसी बोझ उठाइँदैन
सकिन्न जानै पनि देश छाडी
कता गए ती अधिकारवादी ।

यो देश टुक्र्याउन खोज्छ कोही
अन्तै लगी मिल्न तयार कोही
भुट्छन् मकै के जब फुट्छ हाँडी
कता गए ती अधिकारवादी ।

गोडा दिंदै ढोग्न लगाउँदैछन्
रोटी कुहेको पनि दान दिन्छन्
भैंसी दुहे वन्धनमा छ पाडी
कता गए ती अधिकारवादी ।

काठमाडौ