नेपाली हास्यव्यङ्ग्य अनलाइन पत्रिका

सबै नेता उस्तै फगत पदकै लालच यहाँ
इसारामा नाँच्दै लचक कटिमा झुक्दछ कहाँ ?
अहो ! साँढे जस्तै वरिपरि बडा दुश्मनहरू
छ भोग्नै लेखेको अझ कति कडा दुर्दिनहरू !
(१)
थिए नेपालीका जुन सबल खम्बा र गरिमा
उनैले छाड्दैछन् अब किन सबै स्तुत्य महिमा ?
कथम् यस्तै हाम्रो नियति बनिराखे शठहरू
नभोगी के गर्ने अझ कति कडा दुर्दिनहरू !
(२)
भएको देख्दैछौं किन पतन सिद्धान्तहरूको ?
झरे आस्थाबाटै अझ तलतलै पात्र हलुको !
बनेका आफैं नै युगपुरुष यी दुर्जनहरू !
छ देख्नैपर्ने लौ, अझ कति कडा दुर्दिनहरू !
(३)
अनास्था राखेरै पनि सपथको स्वाङ गरिने
बनेका नौटंकी नटसरि घृणा(भाव भरिने
म आशा बुख्याँचा पतितहरूको कति गरूँ ?
रहेकै सामुन्ने अझ कति कडा दुर्दिनहरू !
(४)
कि मत्ता साँढेझैँ कथित ‘प्रभु’का दंशहरूले
डसेका रैती हुन् ? कि त अबुझ यी षण्डहरूले
बुझेनन् आफ्नो त्यो जनबल कठै निर्बलहरू !
अहो, भोग्नैपर्ने अझ कति कडा दुर्दिनहरू !
(५)
सुगाझैँ रट्दैछौ भन कति अझैँ पूर्व(महिमा
गरेनौ कर्मै क्यै किन समयको राख्न गरिमा ?
सहेरै व्यर्थैमा पशु सरह बाँच्यौ दिन बरु
नजाग्दा भोगौला अझ कति कडा दुर्दिनहरू !
(६)
म ठूलो मै अग्लो सकल दलका दम्भहरूले
बढाएरै दूरी गतिरहित भो राष्ट्र अहिले
नबन्लान् चोखा के अब पनि सबैका मनहरू ?
अवश्यै भोग्नेछन् अझ कति कडा दुर्दिनहरू !
(७)
छिमेकी(पीडाले थकित जनता क्षुब्ध छ यहाँ
भरोसा गर्ने त्यो असलपन खै पाउनु कहाँ ?
नजानेझैँ गर्दै अबुझ बनिराखेपछि अरू
नब्यूंझे देखौला अझ कति कडा दुर्दिनहरू !
(८)
सबै मिल्दा होला जरुर पनि यो राष्ट्र बलियो
यही यौटा मात्रै प्रबल छ सधैं स्वप्न कविको
अहो ! ती ब्यूंझेका प्रियजन नदेख्दै म नमरूँ
मिलेरै फ्याँकौंला जति पनि कडा दुर्दिनहरू !!
(९)

दाङ