नेपाली हास्यव्यङ्ग्य अनलाइन पत्रिका

“पुजिन्छन् जहाँ धूर्त, लुच्चा, अयोग्य
र हुन्छन् जहाँ दण्ड–भागी सुयोग्य
जहाँ ‘चाकरी’ योग्यताको कसी छ
जहाँ चेतना–सिर्जना अप्जसी छ

जहाँ राज गर्छन् छुचा केतु–राहु
जहाँ छन् कँुजा न्यायका हात–पाउ
जहाँ सत्यलाई कतै छैन ठाउँ
त्यही देशको नै त ‘नेपाल’ नाउँ”

चिनारी यही नै भएको छ आज
मलेवा छ बन्दी र उन्मुक्त बाज
सधैँ शान्ति–वार्ता, सँगै क्रूर हत्या
हरे ! जो छ द्यौता, उही घोर दैत्य

गुमेको छ नेपालको त्यो प्रतिष्ठा
हुँदा शून्य, नेतृत्वमा नीति–निष्ठा
गरूँ आस— कैल्यै त होला उज्यालो
फटाई यहाँ त्रासदीको तुवाँलोे ।

२८ कार्तिक २०७२
काठमाडौं