नेपाली हास्यव्यङ्ग्य अनलाइन पत्रिका

जो शक्तिमान् जन उही त लुटी रहेछ
पुस्तौं पुर्याउन भनेर जुटी रहेछ
खर्दारले पनि करोड गनी रहेछ
‘मै राष्ट्रसेवक महान् हुँ’ भनी रहेछ !

शस्त्रास्त्रमै बजट धेर गुडी रहेछ
मंत्री छिमेकतिर हेर उडी रहेछ
पाएर दान सब काम चली रहेछ
डुब्दैछ या कठिन याम टली रहेछ ?

उत्थानको गणित शीर्ष चढी रहेछ
पीडा हजार किन फेरि बढी रहेछ ?
गुम्ला कि राष्ट्र ? जन पीर गरी रहेछ
चाहन्छ बाँच्न तर नित्य मरी रहेछ !

फैलेर अग्नि सब भष्म बनी रहेछ
आएर दुश्मन इनार खनी रहेछ !
साख्खै बनेर मन(प्राण थुती रहेछ
‘मान्छे’ तथापि अझ हेर सुती रहेछ !!

आँधी चलेर पनि दीप बली रहेछ
आशा गरौँ कि अब दम्भ गली रहेछ
दुर्भाग्यको पल अवश्य टली रहेछ
उन्मादको गजुर जान ढली रहेछ !!

दाङ