दुर्गाप्रसाद ग्वालटारेबिजुली गजल
असोजकी झरी जस्ती, मेरी बिजुली
स्वर्गलोककी परीजस्ती, मेरी बिजुली ।
लेखिएको केहिछिनमा, खुइलिएर जाने
सिलोटको खरीजस्ती, मेरी बिजुली ।
न्यानो खोज्दै भौंतारिंदै, साइबेरियादेखि
बसाईँ आ’की चरीजस्ती, मेरी बिजुली ।
अङ्ग्रेजको पालादेखि, अझै घिस्रिएको
जीर्ण थोत्रो लरीजस्ती, मेरी बिजुली ।
चुरिफुरी गर्दै आउँछे, आफैं फ्यात्त गल्छे
एकैछिनमा मरी जस्ती, मेरी बिजुली ।
२०७२ मङ्सिर २२
काठमाडौं
Subscribe
Login
0 Comments
Oldest
