नेपाली हास्यव्यङ्ग्य अनलाइन पत्रिका

सोझो, शान्त, इमानदार किन हो लाइन्छ पाखा छिटो
सोही व्यक्ति हुने रहेछ खतरा जो बोल्छ बोली मिठो ।
सत्तासीन पुजी, प्रदक्षिण सधैकक गर्ने ‘टिके’ दौडमा
बाजी मार्छ अरू मिची नियम नै यो लिगलिगे दौडमा ।।

खाएथे विष जेल नेल जतिले सम्पूर्ण दोषी थिए
हो ऐरावण तुल्य बुद्ध सजिलै भै दिन्छ सत्ता दिए ।
पापी, धूर्त र भ्रष्ट पो जब यहाँ निस्कन्छ नेता बनी
राम्रो कर्म गरे नि दण्डित हुँदा श्रापिन् सतीले पनि ।।

ठानी देश ठुलो खुला हृदयले जो देन एक्लै दिए
मारेछन् अघि भीम मल्ल जसले राम्रो गरेका थिए ।
जो सोच्ला हित गर्छु यो मुलुकको त्यै पर्छ बेहालमा
मार्नेछन् अभिमन्यु तुल्य सबले धेरेर नेपालमा ।।

लाखौँमा पनि भीमसेन पहिला मान्छे सधैँ ठानिए
विद्वान्,चेतनशील, लोकप्रिय भै मन्त्री बनेका थिए ।
सच्चा, शासक, देशभक्त र निकै जो दुरदर्शी थिए
राखी राष्ट्रियता अखण्ड र दिगो आफू भने सेरिए ।।

ऐले देश विभूति मान्छ रणमा जो चम्किएका थिए
वैरीले पनि ‘उच्च साहस’ भनी आई बधाई दिए ।
सेनामा पनि ती अस्वीकृत हुँदा भागी बिरानो बने
के मर्थे बलभद्र बाहिर गई सम्मान हुन्थ्यो भने ?

‘राम्रो’ जान्छ कतै पलायन भई आदर्शवादी गल्यो
‘हाम्रो’ को सब देशभित्र अहिले हालीमुहाली चल्यो ।
काशीतर्फ विवेक भासिन गयो आदर्श खाडीतिर
सत्तासीन छली र भ्रष्ट कपटी हुन्छन् यहाँ आखिर ।।

सुर्खेत