नेपाली हास्यव्यङ्ग्य अनलाइन पत्रिका

मेरो यो मनभित्र एक जननी अर्को छ नेपाल यो
यी आँखा द्वयमा हिमालयसँगै होस् शैल सञ्जाल यो ।
छातीमा मुटु हुन्छ देश त्यसको दायाँ र बायाँ रहे
सारा जोखिम मोल्छु हात द्वयमा माटो र झन्डा भए ।।

आमाको पहिचान उच्च जगमा सन्तानका कारण
गर्दा मिल्दछ शान्ति,कान्ति ममता नेपाल उच्चारण ।
गोर्खाली पहिचान साहस ठुलो त्यो युद्धको कौशल
नेपाली गरिमा र शान्तिप्रियता फैलोस् बनी उज्ज्वल ।।

हे आमा घरका विभीषणहरू लागे विपक्षीसित
लड्छन् दाजु र भाइ हुन्छ कुभलो लङ्का डढे झैँ कि त ।
अन्माऊ अझ एकचोटि भृकुटी,सीता भए सम्भव
जन्माऊ अझ बुद्धतुल्य जगमा अर्को महामानव ।।

बस्छन् मूर्ख जहाँ बनेर बलिया विद्वान् रहन्नन् त्यहाँ
त्यागेथे दरबार नै विदुरले अन्याय हुन्थ्यो जहाँ ।
‘ब्बाँसा’ मिल्छ सिनो भनेर नजिकै आएर बाटो ढुके
नेपाली ’यदु वंश’ झैँ पतनको सङ्घारमा पो पुगे ।।

सुर्खेत