नेपाली हास्यव्यङ्ग्य अनलाइन पत्रिका

गरीखाने भोटो टाल्छन्, विडम्बना !
लुटीखाने भुँडी हाल्छन्, विडम्बना !

अन्धकारको सूची टाँस्छन्, गरिबहरू
धनीहरू पैसा बाल्छन्, विडम्बना !

गाउँका बाले स्यौला काट्छन् भित्तो टाल्न
बनका पाले रुखै ढाल्छन्, विडम्बना !

अस्मिताको फुट्टी हाँक्छन् नेताहरू
तिनै आफैं गुण्डा पाल्छन्, विडम्बना !

भोक भजाई श्वास फेर्छन् संस्थाहरू
भोका बालक बालु चाल्छन्, विडम्बना !

महिषासुर नै माहिर यहाँ, भेष बदल्न
पर्दा ‘दुर्गा’ जप्न थाल्छन्, विडम्बना !

(नोट : सबै भुँडी हालेकाहरू घुस्याहा भन्न खोजिएको हैन भन्ने बुझिदिनु हुने नै छ ।)

काठमाडौं