नेपाली हास्यव्यङ्ग्य अनलाइन पत्रिका

चुनाव आयो नेता
जनताको वरपर
चुनाव सकिएपछि प्रजा परपर
कतै नपाइने हाँडीगाउँको तन्त्र
वा प्रजातन्त्र !

धनी धनाड्य सधैं
शक्तिको वरपर
चाकडी चाप्लुसी पनि
सत्ताकै वरपर
बिचरा प्रजा, जा परपर
कस्तो अनौठो तन्त्र
वा प्रजातन्त्र !

हुने खालेलाई त यहाँ सधैं प्रजातन्त्र
जनतालाई यो देखाउने जन्त्र
निमुखालाई यो फकाउने मन्त्र
कागलाई बेल पाकेको जस्तो तन्त्र
वा प्रजातन्त्र !

राणाले पनि भन्थे प्रजातन्त्र छ
राजाले पनि भन्थे प्रजातन्त्र छ
अहिले पनि नेता भन्दैछन् प्रजातन्त्र छ
तर अर्को थरी भन्दैछ
अझै ल्याउनु छ प्रजातन्त्र
जनताको लागि कहिलै नआउने कस्तो तन्त्र
वा प्रजातन्त्र !

दाङ, हाल : काठमाडौं