वासुदेव पाण्डेयनेता, झन्डा र गुनासो
म नेता भनी आत्मश्लाघा गरेछौ
भुँडी, बैङ्क, भण्डार सारा भरेछौ ।
न फर्केर आयौ न वाचा पुर्यायौ
सबै राज्यको कोष रित्तो बनायौ ।।
विदेशी इसारा तिमी मात्र कर्ता
भुल्यौ राष्ट्रझन्डा भयौ कार्यकर्ता ।
छ पार्टी ठुलो एक झन्डा समाई
चुसी खान खोज्छौ अरूको कमाइ ।।
सबै देश फेर्ने चुनावी छ पर्चा
न फेदी न टुप्पो सधैँ हुन्छ चर्चा ।
छली, भ्रष्ट, स्वार्थी, फरेवीहरूको
सधैँ सुन्छ बोली नसुन्ने अरुको ।।
हिलोको किलोझैँ सबैतर्फ ढल्की
जता लाभ देख्यो त्यतैतर्फ पल्की ।
न सिद्धान्त तिम्रो न क्वै स्वाभिमान
सधैँ बेच्न थाल्यौ तिमीले इमान ।।
जनाधार पाई दुराचार गर्छन्
सदाचार गर्ने अभागी ठहर्छन् ।
थिए राष्ट्रघाती गराए वितण्डा
तिनै ओढ्न पुग्छन् मरे राष्ट्रझन्डा ।।
गुनासो छ मेरो छ जो राजद्रोही
सधैँ राज्यसत्ता समाल्दै छ सोही ।
कुनै भ्रष्ट नेता र गुन्डा हिजोझैँ
मरे राष्ट्रझन्डा नओढाइयोस् है ।।
सुर्खेत
Subscribe
Login
0 Comments
Oldest







































