नेपाली हास्यव्यङ्ग्य अनलाइन पत्रिका

भूकम्पनारायण
मैले एक तले हाल्दा
उनले दुइतले ठोके
मैले दुइतले बनाएपछि
उनले चार तले बनाइ रिस पोखे
तिमी आएपछि
मैले कुम्लो कुन्थो बोकेर
चौरीमा पाल ठोकेँ
उनले पनि मेरै नजिक
डेराडुन्डी बोके
आज भोलि उनको
धनको फूर्ति पनि
अलिक घट्दै आको छ
हैन ए भूकम्प नारायण
कति कुरो त
तिमी आएपछि
राम्रो पनि त हुँदै गाको छ ।

अर्का छिमेकी पनि
टेडा यस्ता कि
ठ्याक्कै भेडा जस्ता
छिमेकीहरूसित त बोल्दै नबोल्ने
कहिले भेट्न जाँदा पनि
घरको गेट खोल्दै नखोल्ने
टोलसभामा बोलायो भने पनि
आउँदै नआउने
दुइचार पैसो उठाउँदा पनि
टेरपुच्छरै नलाउने
अजभोलि त साथी हरेकको घरमा गाको छ
तिमी आएपछि त भूकम्प नारायण
साँच्चै कुनै कुरो त गजबै भाको छ ।

तल्लोघरे जेठो पनि
तल झर्दै नझर्ने
टोल छिमेकमा कसैलाई क्यै परे
अघि सर्दै नसर्ने
मानौ
महादेव पनि उसैसँग
लक्ष्मी नारायण पनि उसैसँग
हनुमान पनि उसैसँग भाको जस्तो
घमण्ड पनि यति कि अमृतै खाको जस्तो
अचेल त साथी मुसा जस्तो भाको छ
छिमेकी चाहिँदो रहेछ भन्दै
हरेको काम कुरोमा आको छ
हैन हो भूकम्प नारायण
तिमी आएपछि राम्रो कुरो पनि त भाको छ ।

मान्छेको लोभ कस्तो
आकाशै चाहिएला जस्तो
मान्छेको लालच कस्तो
स्वर्ग नै पाइएला जस्तो
तिमी आएपछि त
मान्छे दयावान हुँदै गाको छ
जे भए पनि भूकम्प नारायण
तिमी आएपछि
धेरै कुरा राम्रो पनि भाको छ ।

दाङ, हाल : काठमाडौं