नेपाली हास्यव्यङ्ग्य अनलाइन पत्रिका

ल यो कुश लिनोस्
यो टपरीमा सय दिनुस्
दुनाह पचास दिनुस्
यो सब तिम्रा बाले पाउँछन्
उता पनि निकै महङ्गी छ रे
दश रुपैयाले त के पो लाउँछन् ।

नर्कमा परेका भए खानु पर्ला
स्वर्गमा भए डिस्कोमा जानु पर्ला
मेनका उबर्शीले नाइटो देखाउलान्
तिम्रा बाले नाइटोमा पैसो हाले पो
इन्द्रले मेहिफिल चलाउलान् ।

यो कुश लेऊ
गाई हो यो
गाईको नै दाम देऊ
तिम्रा बालाई भैंसी होइन
गाईको दुध चाहिन्छ
त्यहाँ पनि चोख्याउन
गाईकै गहुँत खाइन्छ
घोडा दान हात्ती दानको सट्टा
सके कार दान गर
नभए मोटार साइकल दान गर
त्यो पनि सकिदैन भने
साइकल एक थान गर
त्यहाँ पनि हात्ती घोडाभन्दा
मोटर गाडी नै चाहिन्छ रे
घाँसपातभन्दा सजिलै
पेट्रोल नै पाइन्छ रे ।

सुरुवाल भोटि फाल
प्यान्ट, हाफ प्यान्ट हाल
सक्छौ भने भोट्का बोतल हाल
बुढो भएर मरे पनि
सब जवान भइे जाने हो
यहाँ पो क्षत्री बाहुनका कुरा
इन्द्रलोकमा त
सबैले सोमरस खाने हो
भोट्का दियौ भने
तिम्रा बाले पनि इन्द्रलाई
उपहार लगी जालान्
इन्द्रजीले पनि
मृत्यलोकमा बनाएको सोमरस
कस्तो हुन्छ भनी खालान् ।

सक्छौ भने सुनकै
सक्दैनौ भने
राम्रै काठको
शैया दान गर
घैया दान गर
मन खोलेर गर
धन खोलेर गर
आखिर यो सम्पत्ति
तिम्रै बाले कमाको हो
नखाई नलाई
बिचराले जमाको हो
दान धर्म जे गर्छौ
तिम्रा बाले पाउलान्
नत्र भन्द्या छु
तिम्रा बाउ रिशाएर
भूत बनेर आउलान् ।

दाङ, हाल : काठमाडौं