नेपाली हास्यव्यङ्ग्य अनलाइन पत्रिका

कुर्सी मोह र हानथाप यिनको हो श्रेय मात्रै लिन
जे जे गर्नु हुँदैनथ्यो दल मिली गर्छन् छिटो त्यो किन ?
नेता या दलको समर्थन गर्यौँ आएर ढाँटे पनि
हामीमा छ दरिद्र मानसिकता आदर्श छाँटे पनि ।।

चाहन्छौँ सब दौड यो लिगलिगे भन्छौँ प्रजातन्त्र होस्
आफू बाहिरिए नि भित्र मनले चाहन्छ कोही नहोस् ।
सत्ता चल्छ सधैँ समीकरणमा सिद्धान्त फाटे पनि
हामीभित्र छ दास मानसिकता आदर्श छाँटे पनि ।।

पुग्छन् माथि भुली धरातल तिनै खोज्छन् बडी इज्जत
साँच्चै प्वाँख पलाउँछन् र कमिला मर्छन् उडी अन्ततः ।
छाला, पुस्तक, वस्त्र धातु सजिलै टालिन्छ फाटे पनि
हामीभित्र छ रूग्ण मानसिकता आदर्श छाँटे पनि ।।

नेता नाम न नेक, नैतिकपना निष्ठा छ निर्लज्ज झन्
नारा नायकझैँ नपुंसक यिनी नादान निर्वस्त्र छन् ।
बर्षा गर्छ कि लाग्छ घाम घन त्यो आएर फाटे पनि
हामीभित्र छ जीर्ण मानसिकता आदर्श छाँटे पनि ।।

कैले देश भएर भित्र मनमा सत्ता र भत्ता भने
सत्ता बाहिर गर्जिए अझ बढी पक्का विपक्षी बने ।
कुर्सी पाप्त भए त मौन रहने यो देश साटे पनि
हामीभित्र पिशाच मानसिकता आदर्श छाँटे पनि ।।

राम्रो काम भए समर्थन सधैँ आलोचना खोटको
गर्ने उत्तम कार्य हो तर यहाँ खेती गरे भोटको ।
पेवाझैँ उपभोग गर्न दलका झण्डा समाते पनि
हामीभित्र निषेध मानसिकता आदर्श छाँटे पनि ।।

सुर्खेत