नेपाली हास्यव्यङ्ग्य अनलाइन पत्रिका

जहाँ अस्पतालभित्र
स्वयम् डाक्टरहरू बिरामी छन्
मन्दिरभित्र
भगवानहरू बिरामी छन्
पेट बोकेका आमाहरू
र यात्री बोकेका सडकहरू बिरामी छन्
प्रयोग नभएर
कारखाना र नदीहरू बिरामी छन्
नैतिकता र पाखुराहरू बिरामी छन्
कला बिरामी छ
विचार बिरामी छ
अँधेरो पिउँदा पिउँदा
सम्भावना समेत बिरामी छ ।
देश
हो, म तिमीजस्तै बिरामी छु
तर अब कसले औषधि दिन्छ
र निको पार्छ मलाई
जबकि यो देशमा
रोग निको पार्ने
स्वयम् औषधिहरू बिरामी छन् !