नेपाली हास्यव्यङ्ग्य अनलाइन पत्रिका

तिमी बामे नसर्दै दौडिन खोज्छ्यौ अनि मलाई डर लाग्छ
तिमी बोली नफुट्दै गाउन खोज्छ्यौ अनि मलाई डर लाग्छ

यो संसार धेरै ठुलो छ र मान्छेहरू पनि अनेक थरीका छन्
तिमी आँखा नखुल्दै हेर्न खोज्छ्यौ अनि मलाई डर लाग्छ

तिमीलाई हराउन यहाँ जो पनि जसरी पनि आउन सक्छन्
तिमी दाउ नसिक्दै लड्न खोज्छ्यौ अनि मलाई डर लाग्छ

अनगिन्ती भाषाको बिचमा साँच्चै हामी लिलिपुटजस्ता छौँ
तिमी कखरा नबुझ्दै लेख्न खोज्छ्यौ अनि मलाई डर लाग्छ

कति नै भो र बगैँचामा बिरूवा सारेको सम्झिहेर त सानू !
तिमी फल नपाक्दै टिप्न खोज्छ्यौ अनि मलाई डर लाग्छ ।

हेटौडा, मकवानपुर