नेपाली हास्यव्यङ्ग्य अनलाइन पत्रिका

मुलुकमा केही समययता पुरातात्विक उत्खननका समाचार निकै चर्चामा छन् । कपिलवस्तु र रूपन्देहीका ऐतिहासिक स्थलहरूमा धमाधम यस्ता उत्खनन भइरहेका छन् । शाक्यवंशीय राजा शुद्धोधनको प्राचीन कपिलवस्तु गणराज्यको राजधानी तिलौराकोट दरबार क्षेत्रमा प्राचीन सुरक्षा किल्ला फेला परेको छ । त्यस्तै रूपन्देहीको केरवानीमा लिच्छविकालीन पुरातात्त्विक वस्तुहरू भेटिएका छन् । नाक भाँचिएका ढुङ्गाका मुर्कट्टाहरू, प्वाल परेका तामाका मुद्राहरू, मक्किएका माटाका भाँडाकुँडाहरू, सिङ फुक्लिएका बसाहा साँढेका मूर्तिहरू इत्यादि । पुरातात्त्विक उत्खननबाट प्राप्त यस्ता वस्तुको सङ्ग्रह गरेर सङ्ग्रहालय बनाउन सकिन्छ । पर्यटकहरू हेर्न आउँछन् । दरबारका जीर्ण अवशेषहरू, ढुङ्गाका मुर्कट्टाहरू, खोटा मुद्रा, पत्रु भाँडाकुँडा, साँढेका मूर्ति इत्यादि हेरेर रमाइलो अनुभव गर्छन् । उत्खननबाट प्राप्त यस उपलब्धिबाट हामी नेपाली जनता अत्यन्त खुसी छौँ । उत्खनन कर्ताप्रति आभारी छौँ ।
यता वर्तमान नेपाल गणराज्यमा चौहत्तर वर्षअघि जन्मेर सात सालको क्रान्तिदेखि नै राजनीति गर्दै आएका वयोवृद्ध नेता सुशील कोइराला भर्खरै प्रधानमन्त्री भएका छन् । नेपाली काङ्ग्रेसमार्फत नेपाली जनताले बडो यत्नसाथ उत्खनन गरी निकालिएका हाम्रा प्रधानमन्त्री राम्ररी बोल्न सक्दैनन् । हातगोडा लुलिएका छन् । कपाल फुलेको छ । दाँत फुक्लिएका छन् । जोस–जाँगर मरेको छ । सिर्जनात्मक ऊर्जामा धुलिया लागेको छ । तैपनि, हाम्रा यी सन्त प्रधानमन्त्रीको ठूलो महत्व छ । नेपाली राजनीति अब उनकै वरिपरि फनफनी घुमिरहनेछ । उनले नै अब नेपाललाई नयाँ नेपाल बनाउनेछन् । उनी अब सिंहदरबार–बालुवाटार ओहोरदोहोर गररिहनेछन्, साइरन बजाउँदै । हामी सडकवरिपरि अड्किएर रमिता हेर्नेछौँ, ताली बजाउँदै । टेलिभिजन र पत्रपत्रिकामा उनलाई हामी अघाउँजी हेर्नेछौँ । उत्खननबाट प्राप्त यस महत्वपूर्ण उपलब्धिबाट हामी नेपाली जनता अत्यन्त खुसी छौँ, वर्तमान संविधानसभा र राजनीतिक दलहरूप्रति हामी आभारी छौँ ।
हामी निरन्तर उत्खननका क्रममा छौँ, लुम्बिनीको सेरोफेरोमा पनि र सिंहदरबारको सेरोफेरोमा पनि । पहिलो संविधानसभाले चुनेका राष्ट्रपति र उपराष्ट्रपति दोस्रो संविधानसभाले नचिनेपछि नेपाली काङ्ग्रेसले उनीहरूलाई उत्खनन गरी वर्तमान संविधानसभामा उभ्याउने, सबै सभासद्लाई देखाउने, चिनाउने र थप्पडी बजाउन लगाएर चौथो कार्यकाल (पहिलो संविधानसभाका म्याद थप जोडेर) का लागि अनुमोदन गराउने अरे !
नयाँ निर्माण गर्नुभन्दा उत्खनन गरेर पुरानालाई स्थापना गर्दा झमेलामा फस्नु पर्दैन भन्ने कुरामा एमाले सहमत भएको छ । उसले पनि पूर्वसभामुखलाई नै विराजमान गराउने रे । एमालेको आगामी महाधिवेशनमा कमरेड माधव नेपाललाई नै उत्खनन प्रक्रियाद्वारा अध्यक्षमा स्थापना गर्न उनका निकटस्थहरू कम्मर कसेर लागेका छन् अरे । कमरेड ओली पनि कुनचाहिँ ड्याङका हुन् र, झापा विद्रोहको उत्खनन गर्दा फेला परेका त हुन् नि, भन्नेहरू पनि धेरै छन् । स्मरण रहोस्, वर्तमान सभामुख सूर्यबहादुर थापा उत्खनन कार्यबाट प्राप्त सबैभन्दा प्राचीन उपलब्धि हुन् ।
जसरी जताबाट हेर्दा पनि अहिले हाम्रो देश पुरातात्त्विक महत्त्वका व्यक्तिहरूबाट परिवेष्टित छ । पुराना र उहिल्यै मनग्गे प्रयोग भइसकेकाहरूबाट सञ्चालित छ । पाकेर पनि नथाकेका, परिपक्व, अनुभवी, फुलेका र चाउरिएकाहरूको कुशल नेतृत्वमा हामी सुरक्षित र संरचित छौँ । यस्तो शान्त र सुखद वातावरणमा नयाँ र युवा भनाउँदाहरूले मुख मिठ्याउनु बेकार छ । नयाँहरूको कुनै भर हुँदैन । पुरानाहरूबाट कुनै डर हुँदैन, त्यसैले नयाँहरूले अहिले चलमलाउनु ठीक छैन । पुरानाहरूले अझ धेरै बाँच्नु छ, अझ धेरै खानु छ । उनीहरूलाई खाएर धीत मरेकै छैन । भुँडीका कुनाकाप्चाहरू भरिएकै छैन । राम्ररी खाएर हृष्टपुष्ट भई अझै धेरै वर्ष देशको सेवा गर्ने उनीहरूको पवित्र इच्छामा नयाँहरूले बाधा पुर्याउनु हुँदैन । नयाँहरू अहिले धैर्य गर । जबसम्म तिमीहरूलाई पनि उत्खनन गरेर निकाल्नुपर्ने दिन आउँदैन, तबसम्म तिमीहरू पुरातत्त्वको परिक्रमा गर्दै गर । आ–आफ्ना कपाल फुलाउँदै गर, चाउरी बढाउँदै गर, बङ्गारा फुस्काउँदै गर, हड्डी मकाउँदै गर । पुरातात्विक महत्त्वका व्यक्तिहरूको सेवा गर्दै गर । हतार नगर ।

‘नेपाल’ अङ्क ५८३ बाट