नेपाली हास्यव्यङ्ग्य अनलाइन पत्रिका

छोरो भन्छ
पुलिस अफिसर बन्छु
डिआइजी बन्छु
देशको लागि केही गर्छु
हो, छोराले अफिसर भएपछि
नाम कमाउला
दाम कमाउला
तर त्यहाँ पनि त
गुण्डा आउला
पुलिसको हात समाउला
लुटेको दाम थमाउला
त्यसैले मेरो छोरो
न पुलिस अफिसर बन्छ
न डिआइजी बन्छ
बने छोरो गुन्डा नै बन्छ ।

कहिले छोरो भन्छ
डाक्टर बन्छु
सेवा पनि हुने
मेवा पनि हुने
डाक्टर बन्यो भने पनि त
सरकारी होइन
प्राइभेट नै समाउने हो
दुई चार करोड दाम त कमाउने हो
फेरि प्राइभेट अस्पताल पनि त
गुन्डाले नै चलाउने हो
त्यसैले अब
छोरो डाक्टर के बन्छ
बने छोरो गुण्डा नै बन्छ ।

कहिले छोरो भन्छ
कमर्स पढ्छु
सी ओ बन्छु
बैंकमÞा काम गर्छु
बैंकको अखडा पनि त
गुण्डाले नै जमाउने हो
घर घडेरी बेच्न
गुण्डा नै लगाउने हो
त्यसैले अब छोरो
बैंकको सी ओ के बन्छ ?
बने छोरो गुण्डा नै बन्छ ।

कहिले छोरो भन्छ
नेता बन्छु
देशको शिर उठाउछु
विकासको मूल फुटाउछु
तर नेतालाई पनि त
गुन्डाले नै जिताउने हो
गुन्डाकै भलो चिताउने हो
त्यसैले छोरो
त्यो नेता पनि के बन्छ ?
बने छोरो गुण्डा नै बन्छ ।

पहिले सबै गुण्डालाई प्रयोग गर्छन्
पछि गुण्डा सबलाई प्रयोग गर्छन्
गुण्डाकै छ चलखेल गुण्डाकै छ धाक
ठेक्कापट्टा बालुवा गिट्टी गुन्डाकै हाँक
पुलिस नेता कर्मचारी पनि
पाएकै छन्, आफ्नो पाउँछन् भाग
छ भने यो देशमÞा गुन्डाकै छ माग
उद्योगपति ब्यापारी भन्दा
गुण्डाले नै धेर धन फलाउँछन्
यन्त्र तन्त्र संयन्त्र मात्र कहा हो र !
सरकार पनि गुण्डाले नै चलाउँछन्
त्यसैले मेरो छोरो
अब अरू के बन्छ ?
बने छोरो गुण्डा नै बन्छ ।

दाङ, हाल काठमाडौं