नेपाली हास्यव्यङ्ग्य अनलाइन पत्रिका

अमर अधिकारी :

(बाटोमा दुई साथी भेट भएपछि)
पहिलोः कता हिँडेको साथी ?
दोस्रोः बैंकमा खाता खोलूँ भनेको, कहाँ खोल्दा ठीक होला ?
पहिलोः यहीँ नजिकै छ सानिमा बैंक, त्यसमा खोल्नुस्, ब्याज पनि राम्रै दिन्छ।
दोस्रोः ठूलीमा बैंक छैन यतातिर ? अलि बढी दिन्थ्यो कि ब्याज।
-१-

(छोरो विरामी भएपछि श्रीमान्-श्रीमती कुरा गर्दै)
श्रीमतीः ल ! छोराको ज्वरो त च्वाट्टै निको भए छ नि !
श्रीमानः भर्खरै एउटा मोबाइल किनेर ल्याइदिएपछि निको भैहाल्यो नि ज्वरो ! अब मलाई सुरु हुन्छ ज्वरो ।
श्रीमतीः यो मोबाइलले पनि गर्नुगर्या छ बा !
-२-

(टोलमा गुण्डागर्दी हुनथालेपछि एकजना टोलबासी प्रहरीमा पुगे)
टोलबासीः असइसाप ! ह्याँ त साइनबोर्डमा प्रहरी बिट भनेर लेख्या छ, प्रहरीको सिंगो भाँडो कहाँ छ त ?
असइः यस्ता बकवास कुरा गर्न नआउनुस् ! गैहाल्नुस् ह्याँबाट !!
-३-

(भ्रमणमा जानुभन्दा अघिल्लो दिन एकजना आन्तरिक पर्यटक ज्योतिषीकहाँ पुगे)
आन्तरिक पर्यटकः गुरु ! भोलिदेखि एकसाताको भ्रमणमा जानुछ, मलाई रुघाखोकी लाग्ला कि नलाग्ला ?
ज्योतीषीः तपाईँले मलाई डाक्टर भन्ठानुभो कि क्या हो ? म त ज्योतिषी हूँ।
-४-

०००
खुंग्री, रोल्पा। हालः बुढानिलकण्ठ, काठमाडौँ