निलहरि काफ्लेआश्वासन
छाप्रोमा आगो बल्दैन, रित्तै हुन्छ भाँडा वर्तनहरू पाँचतारेको जमघट डकारी डकारी पेट भर्ने गर्छन्
प्रमोद भट्टराई ‘प्रतीक’ :
गुलिया मिठा आश्वासनहरू त बहुतै छर्ने गर्छन्
को खाई को खाई भन्छन्, आफैँ हाम गर्ने गर्छन्
जनताको सेवक हौँ भन्ने नै मालिक छन् अहिले
राम्रो फसल देख्नै हुँदैन मुख जोतेर नै चर्ने गर्छन्
कमजोर छ भने स्थान पाउँदैन इमानदारले पनि
स्वार्थ मिल्दा अपराधीको पनि शरण पर्ने गर्छन्
छाप्रोमा आगो बल्दैन, रित्तै हुन्छ भाँडा वर्तनहरू
पाँचतारेको जमघट डकारी डकारी पेट भर्ने गर्छन्
यस्तै रहेछ लोकतन्त्रको गुण र विशेषता बुझियो
जनताहरू भने छटपटिएर अकालमा मर्ने गर्छन् !
०००
कौशलटार, भक्तपुर ।
