नेपाली हास्यव्यङ्ग्य अनलाइन पत्रिका

नील हरि काफ्ले :

पुष्ट मेरो यो देशलाई चक्कर लाग्यो आज ।
आँखा चिम्ली कुदाउँदा ठक्कर लाग्यो आज ॥

बेमौसमी बाली लागाउन अनौँ समात्दै छ
उस्कै हलो उस्कै फाली पत्थर लाग्यो आज ॥

पाका गोरु फ्याँ फ्याँ भए खेत बाँझो जोत्दा
रहर गर्ने बहर माथि लक्कर लाग्यो आज ॥

बुढा ठिटा सिंगौरीले सिङ् फुक्लेला बरू
बिना स्वाङ्को पौँठेजोरी मत्थर लाग्यो आज ॥

सुनामीको झोक्कासँग भिड्ने अठोट पनि
टुप्पोबाट भुइँमा खस्ने पत्कर लाग्यो आज ॥

०००
सिन्धुली, हाल काठमाडौं