नेपाली हास्यव्यङ्ग्य अनलाइन पत्रिका

नीलहरि काफ्ले :

मृदुभाषी मन लिएर आओस् नयाँ वर्ष !
खुसीयाली झन् लिएर आओस् नयाँ वर्ष !!

तँछाडमछाड लुछाचुँडी यै वर्षले राखोस्!
नविन कन्चन तन लिएर आओस् नयाँ वर्ष !!

जति टाल्यो उति खन्यो गरिबीले खाडल !
दुःख पुर्ने धन लिएर आओस् नयाँ वर्ष !!

भ्रष्टाचारका फौजी मास्न योद्धा जन्मिन्छ कि!
गोली गठ्ठा रन लिएर आओस् नयाँ वर्ष !!

बुढो रुख यो गणतन्त्र ढल्छ कतिखेर !
पात पालुवा वन लिएर आओस् नयाँ वर्ष !!

०००
सिन्धुली, हाल काठमाडौं