नेपाली हास्यव्यङ्ग्य अनलाइन पत्रिका

डिल्लीप्रसाद अधिकारी :

सबै गोरे सबै राम्रा कसले भन्छ काले छ नि ?
तर समाज सतहमा किन बस्न थालेछ नि ?

शिक्षा अब सूचनाको सीमासम्म खुम्चिएछ
ज्ञान अब सञ्चारले खोसी हालेछ नि ।

टुक्रिएर एउटा एउटा मन बोकी हिँड्छ मान्छे
कसरी भो सभ्य समाज सामाजिकता फालेछ नि ।

अर्काकै छ राम्रो भाषा आफ्नो सबै बिर्सेपछि
बेथितिको संस्कृति पो यो पिँढीले पालेछ नि ।

नाङ्लो भई भुस बियाँ फाल्नु पर्छ भन्थे
राम्रा जति फ्याँक्नलाई चाल्नी बन्दै चालेछ नि ।

संस्कारका कुरा अब टेलिभिजन सिकाउँछ
दन्तेकथा सुनाउन छोडे आमा बाले पनि ।

ए कवि हो, गजल भन्न अझै कति अघि सर्ने ?
अबकाले सुन्ने दुवै कानहरू टालेछ नि ।

०००
सिक्किम