नेपाली हास्यव्यङ्ग्य अनलाइन पत्रिका

बालकृष्ण खनाल :

छिमेकीले चन्द्रमामा बस्ती सर्ने कुरा गर्छन् ।
हाम्रा भने स्वर्ग जान छिटो मर्ने कुरा गर्छन् ॥

तुइन तान्न परेको छ पुल हाल्न नसकेर
गाईको पुच्छर समाएर नदी तर्ने कुरा गर्छन् ॥

बाचुन्जेली भनेन ‘के छ तेरो हाल चाल ?’
मरे स्वर्ग पठाएर झोली भर्ने कुरा गर्छन् ॥

कमाएको दान गरी भोक भोकै रमाएर
अर्को जन्म मिल्छ भन्दै आश गर्ने कुरा गर्छन् ॥

जस्ले झुठा कुरा गर्छ उसैलाई देव मानी
सष्टाङ्ग दण्डवत् गरीपाउँ पर्ने कुरा गर्छन् ॥

०००
टीकापुर, कैलाली