नेपाली हास्यव्यङ्ग्य अनलाइन पत्रिका

१.
सयको हजार हुन थाल्यो कसरी बाँच्ने हो ?
सिस्नुझैं बजार हुन थाल्यो कसरी बाँच्ने हो ?
टालाटुलीको पुतलीजस्तो नौरङ्गी यो सरकार
लुटेराकै मतियार हुन थाल्यो कसरी बाँच्ने हो ?

२.
करमाथि चन्दा लिइरहेको छस् स्यावास सरकार
दुखियाका आँसु पिइरहेको छस् स्यावास सरकार
केही पनि दिएन भन्नेहरूका मुखमा बुजो लगाउन
महङ्गी र कुशासन दिइरहेकै छस् स्यावास सरकार ।

३.
जङ्गलको ढेँडुलाई महाराजको पगरी भिराएपछि
पीडकको बदला पीडितलाई जरिवाना तिराएपछि
कस्तो हुँदोरहेछ देशको अवस्था हेर्दै जानुस् महोदय
चिडियाखाना पठाउनु पर्नेलाई सिंहदरवार छिराएपछि ।

४.
सन्धिसर्पनझैँ आफ्नै चाहनामा नुन छर्केर बसेको छु
दुख्छ यो मुटु चस्किइरहन्छ शिशाझैँ चर्केर बसेको छु
म मान्छे हुँ कि अरू केही मैले भनेर कहाँ हुँदो रहेछ र
प्रमाणित गर्ने परमात्माको परमादेश पर्खेर बसेको छु ।