नेपाली हास्यव्यङ्ग्य अनलाइन पत्रिका

१.
हातमा कहिले मलम हुन्छ कहिले चाबुक हुन्छ
मन कहिले मातहत हुन्छ कहिले ताल्लुक हुन्छ
कहिले जुट्छ कहिले छुट्छ भरोसा गर्नै मुश्किल
सम्झौताको सम्बन्ध हजुर असाध्यै नाजुक हुन्छ ।

२.
खतरा बारूद या गोली हो जिम्मा लिन कसले सक्छ
साधुत्व भिक्षा कि झोली हो जिम्मा लिन कसले सक्छ
भेटौंला फेरि तिमीले भन्दा भन्न त हुन्छ भन्दिएँ मैले
जिन्दगी आज कि भोलि हो जिम्मा लिन कसले सक्छ ।

३.
रिसले होस् या प्रेमले छोराछोरी नकुट्ने कोही छैन
फुट्यो भनेर शोक नगर्नुस् बनेर नफुट्ने केही छैन
कति भेटिए कति छुट्टिए बेहिसाब यो जीवन यात्रामा
छुट्यो भनेर चिन्ता नगर्नुस् मिलेर नछुट्ने केही छैन ।

गुल्मी