नेपाली हास्यव्यङ्ग्य अनलाइन पत्रिका

१.
नजानुको नतिजा गएपछि थाहा हुन्छ
दुखाईको गहनता सहेपछि थाहा हुन्छ
भएको जे छ त्यो सस्तो कदापि नठान्नु
हुनुको अर्थ के हो नभएपछि थाहा हुन्छ ।

२.
प्रेमको परिभाषा दिलको निर्बन्धनमा खोज्नु
शून्यमा खोज्नु निराकार निरञ्जनमा खोज्नु
कहिँ कतै संशय या प्रश्नहरू बाँकी छन् भने
जवाफ आफ्नै अनुभूति र स्पन्दनमा खोज्नु ।

३.
एउटा सकिन्छ र अर्काको पालो शुरु हुन्छ
कतै अँध्यारो हुँदा कतै उज्यालो शुरु हुन्छ
भ्रम मात्रै हो बुझ्नु नजिक र टाढा भन्नू पनि
सबै तर्किन्छन् यात्रा जब ओरालो शुरु हुन्छ ।

४.
सुन्दैन सुन्नु पर्नेले व्यर्थैमा कराउनु मात्र
आफ्नै यो ज्यान अधमरो गराउनु मात्र
कति सराप्नु हँ यी प्रदूषित नेताहरूलाई
बित्थामा आफ्नै मुख बिटुल्याउनु मात्र ।

५.
नोटबन्दी भएको नोट कहाँ भज्दो रहेछ र
सहरलाई गाउँका कुरा कहाँ जँच्दो रहेछ र
जस्तो गर्‍यौ तिमीले त्यस्तै गरौंला म पनि
एक हातको थपडी त कहाँ बज्दो रहेछ र ।

गुल्मी