नेपाली हास्यव्यङ्ग्य अनलाइन पत्रिका

१.
कसैलाई सागर त कसैलाई कुवा हुन मनपर्छ
कसैलाई फाली त कसैलाई जुवा हुन मनपर्छ
यो रुचिको विषय हो, जसले जेसुकै भनेपनि
कसैलाई बादशाह, कसैलाई दुवा हुन मनपर्छ।

२.
बगरमा फुल्नेहरू सबै सबै काँस हुन सक्दैन
ठूलो अण्डा पार्दैमा कुखुरा हाँस हुन सक्दैन
के पो हुन्छ र, आफ्नो भाउ चुरीफुरी देखाएर ?
जति नै बढे पनि निँगालोले बाँस हुन सक्दैन।
३.
विसङ्गत वर्तमानले रेटिएको के कुरा गर्नु हो
कमजोर निर्बलमा समेटिएको के कुरा गर्नु हो
म जवाफ दिनेवाला छैन, हालखबर सोधे पनि
आफूबाट स्वयं म लखेटिएको के कुरा गर्नु हो ।

४.
बेसरमीको चुरीफुरी कति दिनको रैछ हेरौँ
हाम्रो यो निकट दूरी कति दिनको रैछ हेरौँ
शङ्काको बीउ रोपिएको त्यसै कहाँ हो र?
रहर हो कि मजबुरी कति दिनको रैछ हेरौँ ।

काठमाडौं