नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
उठाउनेभन्दा समातेर झार्ने धेरै भएपछि
कामको बदलामा कुरा नार्ने धेरै भएपछि
यस्तो चालाले कसरी देशको प्रगति हुन्छ
बनाउनेको तुलनामा बिगार्ने धेरै भएपछि ।

२.
सिनोमा गिद्ध र स्यालको लडाईँ कहिलेसम्म
भस्मासुरहरू बिचको हर्ष बढाईँ कहिलेसम्म
सोध्नु पर्छ प्रश्न अब सिँहदरबारसँग जनताले
सन्तको भेषमा सैतानको रजाईँ कहिलेसम्म ।

३.
आरम्भमा होला कि मुख्य भेद आखिरमा होला
शृङ्गारमा होला कि भावार्थ संवेदना पिरमा होला
टिप्पणी वाहवाहका देखेर कहिलेकाहीं सोच्छु म
वाह वाह सिर्जनामा कि कामुक तस्विरमा होला ।

४.
मस्तिष्कले सिकाएसरि दुरूस्त गर्न मनले मान्दैन
उमेरले नौँडाँडा काटिसक्यो रहरले त्यस्तो ठान्दैन
लाग्छ फुलेको कपाल रङाऊँ ऐनासँग बैमानी गरूँ
चाउरी परेको छालाले परन्तु बेइमानी गर्न जान्दैन ।

०००
भैरहवा