नेपाली हास्यव्यङ्ग्य अनलाइन पत्रिका

डा. श्यामप्रसाद न्यौपाने :

१.
शासनसत्तामा शकुनी र दुर्योधनमात्र भरिन्छ भने
त्यसमाथि कंश र दुशासनको खुट्टा दह्रिन्छ भने
देशको सुन्दर इतिहास मेटिन कत्ति बेर लाग्दैन
चङ्गेजखाँलाई फूलमालाले स्वागत गरिन्छ भने ।

२.
सत्ता फेरियो, शासनतन्त्र फेरिएन अझैँ
जनता झुक्याउने षड्यन्त्र फेरिएन अझैँ
कस्ता अगुवा जन्माए समय र जनताले
शासकले देश लुट्ने मन्त्र फेरिएन अझैँ ।

३.
लोभीपापीहरूले देशलाई जुवाको खाल बनाए
शासनसत्ताको चुलीमा पुग्न अनेक जाल बनाए
हिजो, सत्ता पाए त देश सुन्दर बनाउँथ्यौँ भन्नेले
आज हेर्दाहेर्दै समृद्ध देशलाई हरिकङ्गाल बनाए ।

४.
मनभित्र तीखा काँडा भएपछि
अगुवा नै समाज भाँडा भएपछि
समाजमा सद्भाव फैलन्छ कसरी
मानवबस्ती नै धर्मछाडा भएपछि ।

०००
सुनवल -१२, नवलपरासी