नेपाली हास्यव्यङ्ग्य अनलाइन पत्रिका

।।१।।
बोक्रेपनमा रमाउने बानी परेर हो कि
धाकमात्रै जमाउने बानी परेर हो कि
डाँडा खारेर भ्यू टावर बनाइन्छ यहाँ
हरकाममा कमाउने बानी परेर हो कि ।

।।२।।
गीत गाइस् कि ! खबर्दार
स्वत्व चाहिस् कि ! खबर्दार
नजर झुकाउनू हाम्रो अगाडि
शिर उठाइस् कि ! खबर्दार ।

।।३।।
कंश काखा अर्जुन पाखाको नीति अपनाएर के गर्नु भा हो कुन्नि
रामराज्यमा रावणराजको थिति समाएर के गर्नु भा हो कुन्नि
सामाजिक मर्यादा र कानुनीराजको वकालत गर्ने सभ्य सभामा
कानुनले डामेकालाई नै अतिथि बनाएर के गर्नु भा हो कुन्नि ।

।।४।।
आफ्नै कर्तुतले आफैंलाई बिझाउँछ भने
धुन्धुकारीय कृत्यले बदनामी फिंजाउँछ भने
अब त रावण नभएकै जाती होइन र प्रभु !
आफ्नै विगतले आफैंलाई नै गिज्याउँछ भने ।

सुनवल – १२, नवलपरासी