तीन ठोक्तक
विपनाको रहर भन्दा, सपनाको शहर प्यारो लाग्छ हजुर । युद्धमा शत्रु पक्ष छान्न नसक्नेलाई के-को आफन्ती भन्नु ?
गायत्री परिरोशनी :
१.
देश ठूला कुरा छाद्ने डहर भएको छ ।
बाध्यताले विदेश जानु रहर भएको छ ॥
भकारो खाली हुँदैन, ढुक्क हुनुहोस् सबै ।
सत्ता खाएको बुढो गोरु, बहर भएको छ ॥
२.
ठोक साथी ठोक यो समय ठोक्नेको हो ।
चाकरी गर्न ज्यूँदो लाश बोक्नेको हो ॥
सदाचारका कुरा एकादेशको कथा हुँदैछ ।
दिनरात सबै, क्वाप्प देशलाई टोक्नेको हो ॥
३.
सधैँभरी खुट्टा तान्न नसक्नेलाई के-को आफन्ती भन्नु ?
दुःख पर्दा लात्ती हान्न नसक्नेलाई के-को आफन्ती भन्नु ?
विपनाको रहर भन्दा, सपनाको शहर प्यारो लाग्छ हजुर ।
युद्धमा शत्रु पक्ष छान्न नसक्नेलाई के-को आफन्ती भन्नु ?
०००
स्याङ्जा