नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
नै मन बिचारविहीन खाली हुन सक्दैन
आएर फूल मात्रै तोड्ने माली हुन सक्दैन
नागरिकता भन्नू हजुर काकताली मात्रै हो
देश जल्दा नजल्ने मन नेपाली हुन सक्दैन ।

२.
एकै खाले घटनाले बराबरी छोउन् जरुरी छैन
मेरा आँखा जस्तै तिम्रा पनि रोउन् जरुरी छैन
सपना देख्ने रहर गर्छन् संतप्त आँखाहरू तर
मेरा जस्तै सपना तिम्रा पनि होउन् जरुरी छैन ।

३.
दरखास्त या फिरादहरू आफैँसङ्ग हुन्छन्
मनभित्रका अवसादहरू आफैँसङ्ग हुन्छन्
फरक पर्दैन कोही साथमा हुनुले र नहुनुले
अप्रतिम चक्लेटी यादहरू आफैँसङ्गै हुन्छन् ।

४.
मिति पुगेपछि प्रेमील वस्तु पनि डढाइन्छ
खोज्दैछु त्यो स्कुल जहाँ जिन्दगी पढाइन्छ
तिमीलाई फूल भनौं भने पनि कसरी भनौँ
फूल पनि टिपिन्छ ढुङ्गाको मुर्तिमा चढाइन्छ ।

०००
भैरहवा