नेपाली हास्यव्यङ्ग्य अनलाइन पत्रिका

लक्ष्मी जयन्ती २०२२ (लक्ष्मीप्रसाद देवकोटा जयन्ती) गत हप्ता अक्टोबर ३०, २०२२ मा सदा झैं बृहत् साक्रमेन्टो क्षेत्रको डेविस शहरमा सम्पन्न भएको छ ।

यो कार्यक्रम सन् २०१६ सालदेखि यस शहरमा भव्यताकासाथ शुरु हुन थालेको हो । उक्त शहरको मेरी एल स्टेफेन्स पु्स्तकालयको हलमा सम्पन्न भएको कार्यक्रमको आरम्भ महेश गौतमजीले स्वागत मन्तव्य, प्रमोद अमात्यले कार्यक्रम खाका र निरन्जन वाग्लेले महाकविको कविता अंश पाठ गरेर गर्नु भएको थियो । यस कार्यक्रमको सञ्चालन स्वस्तिका स्वस्तिजी र बाबु आचार्यजीले गर्नुभएको हो ।

कार्यक्रम सञ्चालन अगाडि भेटघाट, पुस्तक प्रदर्शन, विक्री वितरण तथा चियापानको अनौपचारिक कार्यक्रम रहेको थियो । मञ्चमा कुनै औपचारिक आसन ग्रहण, माला खादा, भाषण आदि गतिविधि बेगर सहज र सरल तवरमा रचना वाचन र श्रवणको कार्य सम्पन्न भएको थियो ।

रचना वाचनमा विनोद पौड्याल, कृष्णमान श्रेष्ठ, अमर तामाङ, सर्वज्ञ वाग्ले, नवराज कार्की, दुर्गा दाहाल तथा सुरेश भट्ट हुनुहुन्थ्यो । त्यस्तै रितादेवी प्रधान, शान्ति पौडेल, मधु पोख्रेल, र स्वस्तिका स्वस्तिले पनि आफ्ना रचना सुनाउनु भएको थियो । साथै, बाबु आचार्य, मुरारी पौडेल, सुरेन्द्र वाग्ले, महेश गौतम, निरञ्जन वाग्ले तथा प्रमोद अमात्यले आआफ्ना रचना सुनाउनु भएको थियो ।

अनुशासित, शान्त वातावरणमा कार्यक्रम सफलताकासाथ सम्पन्न भएको थियो । अन्तमा हल्का खाना, फोटो सेसन र विचार विमर्श र अर्को वर्ष फेरि भेला हुने वाचा सहित कार्यक्रम समाप्त भएको थियो ।

०००