नेपाली हास्यव्यङ्ग्य अनलाइन पत्रिका

काठमाडौं, ०८० जेठ २७ । अभिनव साहित्य समाजको आयोजनामा भैरव स्मृति भवन जोरपाटी, गोकर्णेश्वर न.पा. काठमाडौंमा कृष्णराज पुडासैनीद्वारा स्थापित विष्णुचन्द्र अभिनव वर्षोत्कृष्ट गद्य कविता पुरस्कारबाट ओखलढुङ्गाका भोलानाथ सुवेदी पुरस्कृत हुनुभएको छ ।

सुवेदीलाई नगद सात हजारसहित सम्मानपत्र अर्पण गरिएको थियो । सोभन्दा अगाडि साहित्यकार प्रदीपरत्न शाक्यद्वारा स्थापित विष्णुदेवी अभिनव साहित्य सिरपा अन्तर्गत भएको स्थलगत मुक्तक लेखन तथा वाचन प्रतियोगितामा जिज्ञाशु पौडेल, लक्ष्मी रायमाझी, अमृत भट्टराई क्रमशः प्रथम, द्वितीय र तृतीय हुनुभयो । यस्तै सान्त्वना पुरस्कार जित्न सफल हुनुहुनेमा इष्टपोल मा.वि.का छात्रा आराद्रा ढुङ्गाना हुनुहुन्थ्यो ।

यसका साथै २५६ औँ शृङ्खलाविशेष कवि गोष्ठीसमेत सम्पन्न भएको छ । समाजका उपाध्यक्ष विमल अर्यालको सभापतित्व, ध्रुव मधिकर्मीको प्रमुख आतिथ्य, विजय चालिसेको विशेष आतिथ्य, शारदा पराजुलीको उद्घोषण, मेनका आचार्यको स्वागत मन्तव्य र रचना वाचन, घनश्याम प्रसाईको अन्य व्यवस्थापन र रचनावाचन, समाजका अध्यक्ष गोविन्दप्रसाद घिमिरे वेदमणिले धन्यवाद ज्ञापन र वाचित कवितामाथिको टिप्पणी प्रस्तुत गर्नुभएको थियो ।

कवि गोष्ठीमा सहभागी हुने मध्ये प्रियन्सा कार्की, बुद्धिसागर पौडेल, रत्ननिधि रेग्मी र ललिता दोषीलाई प्रोत्साहन पुरस्कार प्रदान गरिएको थियो । अन्य सहभागी कविहरूमा पवन सङ्ग्रौला, सुरेशचन्द्र घिमिरे, अच्युत पौडेल चिन्तन, डिल्लीराज अर्याल (विशेष अतिथि), खोलाघरे साइँलो, बद्रीप्रसाद सुवेदी, रामकुमार पंडित, हरि डाँगी, माधवलाल श्रेष्ठ, बी.पी. इलामे, बाजुराम पौडेल, उर्मिला पन्त/पोण्डेय, भावना न्यौपाने र गीता बराललगायत एकाउन्नजना रहनुभएको थियो ।

मुक्तक लेखन तथा वाचन प्रतियोगितामा यस पटक इष्टपोल मा.वि., अरुणिमा शैक्षिक प्रतिष्ठान, सरस्वती मा.वि.का विद्यार्थीहरू सहभागी रहनुभएको थियो । सहभागी गराउने विद्यालय र उपस्थित सबैप्रति अभिनवले हार्दिक धन्यवाद व्यक्त गरे थियो ।

०००