नेपाली हास्यव्यङ्ग्य अनलाइन पत्रिका

काठमाडौं, २०८१ फागुन १ । लेखक तथा सञ्चारकर्मी राजेश खनालद्वारा लिखित व्यक्तिवृत्त चिकित्साका चौध ताराको विमर्श कार्यक्रम सम्पन्न भएको छ ।

सुनकोसी वाङ्मय प्रतिष्ठानको आयोजनामा भएको उक्त कार्यक्रममा वरिष्ठ स्त्रीरोग विशेषज्ञ प्रा.डा.सुमनराज ताम्राकार तथा वरिष्ठ मनोचिकित्सक डा.अनन्त अधिकारीले पुस्तकको चर्चा गरे ।

पुस्तकको चर्चा गर्दै प्रा.डा.ताम्राकारले हिजोको चिकित्साक्षेत्रमा लागिपरेकाहरुको वारेमा यसरी कृति लेखिनु महत्वपूर्ण भएको बताए । उनले यो पुस्तक चिकित्साक्षेत्रमा लाग्ने र नलाग्ने सबैले अध्ययन गर्नुपर्ने पुस्तक रहेछ । हिजोको चिकित्सा पुस्ताले गरेको दुख र भोगाईका कुराहरु कतिपय आफुलाई नयाँ लागेको छ । पुस्तक पढेर थाहा पाएको छु । प्राविधिक रुपमा गाह्रो काम राजेश खनालले गरेकोमा उनी धन्यवादको पात्र छन् । प्रा.डा.ताम्राकारले आफ्नो अनुभव समेत जोडेर चिकित्साक्षेत्रका चुनौतिहरु बारे जानकारी समेत दिए ।

अर्का चर्चाकार डा.अधिकारीले हजुरबुवा र वुबा पुस्ताका चिकित्सकहरुको वारेमा गैह्र चिकित्सकले लेखेको यो कृति महत्वपूर्ण छ भन्दै हिजोका पुस्ताका दुख,हण्डरहरु पाठक समक्ष पु्र्याउन कृति सफल भएको बताए । चिकित्साक्षेत्रको पायनियर रहेका व्यक्तित्वहरुको कृतिको रुपमा चिकित्साका चौध तारा आएको छ । अग्रज पुस्ताका १४ जना चिकित्सकहरुको जीवनका विभिन्न पाटो सहित हिजोको चिकित्साक्षेत्र कति कठिन थियो भन्ने बारेमा उनीहरुको भोगाइ पुस्तकले ल्याएको छ । विभिन्न विषयगत क्षेत्रका पायनियर चिकित्सकहरुले बेहोरेका धेरै कुराहरु हामीलाई प्रेरणा दिने खालका भएको र आफुले समेत थाहा नपाएका कुराहरु पुस्तक पढेर थाहा पाएको हुँदा कृति महत्वपर्ण रहेको बताए ।

प्रमुख अतिथि वरिष्ठ साहित्यकार श्रीओम श्रेष्ठ रोदनले खनालको पुस्तकले स्वास्थ्यक्षेत्रको पृष्ठभूमि र जानकारी दिन सफल रहेको बताए । कृतिले चिकित्सक लगायत स्वास्थ्य क्षेत्रको सम्मान गरेको छ । निबन्धात्मक शैलकिो प्रचुरताले कृति भरिएको छ । यो कृति सबैको निम्ति उपयोगी छ । अग्रज चिकित्सकहरुको बारेमा लेखिएको कृतिको चर्चा चिकित्सकहरुबाटै हुनु महत्वपूर्ण भएको उनले बताए ।

कृतिकार राजेश खनालले कृति तयार पार्दाका अनुभवहरु सुनाए । वाङ्मयका अध्यक्ष साहित्यकार छविरमण सिलवालले उपस्थित सबैलाई स्वागत गर्दै सुुनकोसी वाङ्मय प्रतिष्ठानको उद्देश्यवारे जानकारी दिए ।

वरिष्ठ साहित्यकार श्रीओम श्रेष्ठ रोदनको प्रमुख आतिथ्यतामा सम्पन्न उक्त कार्यक्रमको सञ्चालन वाङ्मयका महासचिव प्रदीप सापकोटाले गरेका थिए ।

०००
– प्रदीप सापकोटाकाे साैजन्यमा