नेपाली हास्यव्यङ्ग्य अनलाइन पत्रिका

आर.सी. रिजाल :

“छोराबुहारीले खेदे” भन्दै आश्रमको ढोकामा रुँदै गरेकी बुढी आमाको तस्वीर फेसबुकमा देखेपछि रमनले श्रीमतीलाई– तिमीलाई आमाको अवस्था थाहा छैन ? जन्मदिने आमालाई छोरीले वास्ता गर्नु पर्दैन ? भने।

श्रीमतीले — मैले थाहा पाएर के गर्नु ?आमा हराइन, तिम्रोमा आइन् की भनेर दाजुले साँखिलो पारेको ५ दिन भयो। त्यसदिनदेखि मेरा आँखा रसाएको रसाऎ छ्न् । के गर्नु आफू छोरा भएर जन्मन पाइनँ । आमाको जिउनी दाजुले लटरपटर पारीहाल्यो। टाटपल्टेकी आमालाई तपाईंको घरमा कसरी ल्याउनु ?

रमनले — मायालाई सम्पत्तिमा तौलन हुन्न । अनि घर पनि तिम्रो र मेरो छुट्टै हुन्छ लाटी ? फरक कोखबाट जन्मे पनि आमाको लागि ज्वाइँ र छोरा एकै हुन्। हामीले आफ्नो आमालाई स्याहारसुसार गरिरहेका छौं भने सासूआमालाई स्याहार्न किन नहुने ?

भोलि समाजले छोरा त जोइटिङ्ग्रे भयोभयो। ज्वाइँछोरी पनि कस्ता रै’छन भन्दै कुरा काट्दैनन् ? दुई सम्धिनी आफ्ना बिगतका गफ गर्दै रमाइलोसँग दिन काट्छ्न् । सायद विवेक पुर्‍याउन नसक्ने ज्वाँइका कारणले नै होला -” ज्वाइँ न स्वाइँ अगुल्टाले च्वाँइ” भन्ने उखान उमारेका। हिँड आमालाई लिनजाउँ भने।

श्रीमानको आग्रह सुनेर उनको प्रेमाश्रु बहे।

०००
मकवानपुर